Klender : Enyak Sarfinah

Nyak Sarfinah adalah atu-atunye saksi mate nyang masih idoep atas perjuangan ame kesaktian H. Darip (alm). Umurnye  sekarang sekitar 85 taon. Nyak Sarfinah entu bini ketiga atawa keempat dari H. Darip, gak ade yang tau berapa tepatnye semue bini dari H. Darip.

Tempo zaman Belande, kalo terang bulan di Betawi, biasanye bocah-bocah ame remaja Betawi pade ngumpul dan maen di plataran rume,  nyang rate-rate emang loas. Orang tue perempuan ame perawan Betawi biasanye pade nganam  (menganyam) tiker pandan di paseban rume. Sebage kembang kampung waktu ntu, banyak lelaki nyang pade dekitin sambil pura-pura bantuin  Sarfinah mude nganam tiker.

Bebenye Nyak Sarfinah punya name Babe Sarbinih pedagang beras. Pade suatu kutika, Nyak Sarfinah di suruh ngirim beras ke Jatinegara Kaum, buat laskar Klender pimpinan H. Darip. Tempo entu banyak orang nyang suka rela ngasih hasil bumi buat perjuangan rakyat. Sekarung beras nyang dibawa Nyak Sarfinah dari kampung Bulak  diterime H. Darip di rumenye. Ngeliat Sarfinah mude nyang jadi kembang kampung, demenlah H.Darip. H. Darip trus  nulis surat buat Babe Sarbinih dan ngasi duit ame Sarfinah muda.

“ Kate babe, nih beras buat pasukan, Bang, jadi gak usah bayar, “ kate Sarfinah mude.

“ Bukan, ntu buat elu jajan, pegang aje, trus kasi nih surat buat babe luh!” jawab H. Darip.

Sejak ntu, tiap bulan puname di rume Nyak Sarfinah jadi sepi, rupenye Babe Sarbinih nerima surat pinangan dari H. Darip. Kaga ade lagi anak mude nyang berani deketin Sarfinah mude. Kutika nike dengan H. Darip umur Nyak Sarfinah baru limabelas taon. H. Darip sendiri ude berumur 50 atawa 60 taon.

Kaga sempet bulan madu, karena suasane perang dengan Belande, menuntut H. Darip buat pinde ke Purwakarte. Di Purwakarte juga belon kondusif bener. Perne waktu lagi masak, Nyak Sarfinah disuruh kemas-kemas buat pinde, barang-barang suruh ditinggalin aje. Kate H. Darip bentar lagi Belande mao nyerang. Bener aje, waktu mereka meninggalkan kire-kire satu kilometer, ntu rume ude dibom Belande. Tapi Sarfinah mude dan H. Darip selamet. Dalam perjuangan enilah, H. Uung anak lelaki pertama H. Darip lahir.

Setelah kejadian entu, mereka akhirnye pindah ke suatu tempat (masih tetap  di wilayah Purwakarte sekarang) di sebuah rume besar milik orang Belanda yang mampu di usir pasukan H. Darip. Di situ tinggal H. Darip bersama empat orang bininye.

Bukan cuman ntu cerita tentang H. Darip nyang ke luar dari cerita Nyak Sarfinah. Perne suatu kutika Nyak Sarfinah diajak ke Jakarte buat ketemu- pasukan pasukan laen, dari macem-macem daerah di Betawi. Pas pulang ke Purwakarta, sepuluh pasukan nyang ikut dipertemuan itu keponggok Belande, sepuluh orang pasukan H. Darip tewas, Nyak Sarfinah ngumpet di semak-semak. Cerita nyang ke luar dari mulut Nyak Sarfinah adalah H. Darip kaga mempan ditembak. Sepuluh pasukannye mati ama Belanda, Tapi Se-truk pasukan Belande juga mati di tangan H. Darip. Akhirnye mereka cuman pulang bedua ke rume di Purwakarte.

Belande kaga perne bise nangkep H. Darip, kecuali mereka make tipu muslihat. Seminggu seude entu dateng tiga orang ke rume H.Darip. Mereka bilang mao ade lagi pertemuan di Jakrate, orang nyang dateng ngaku sama-sama pejuang dari Betawi. Berangkatlah H. Darip ke Kota. Cuman kali ini die berangkat ditemenin sedikit pasukan. Sesampenye di Kota ternyate ude siap Belande ame sekian banyak pasukannye. H. Darip akhirnye ditangkep dan dipenjara di Glodok selame dua taon. Enilah nyang akhirnye bikin Nyak Sarfinah berpisah dari H. Darip. Enih cuman sedikit dari cerita perjuangan H. Dari di masa Belande, belon masuk ke zaman Jepang ame pasca kemerdekaaan.

H.Darif ntu adalah fakta sejarah, die beber-bener perne ade di Betawi, di meninggal taon 1981 di Klender. Pasca kemerdekaan H. Darip lebih banyak ngajar ngaji ame ngajar maen pukul (silat) di Klender. Maen pukul H. Darip beda dari aliran maen pukul nyang laen. Mangkenya namenye jadi “Maen Pukul Gaye H. Darip” bukan aliran Cingkrik, Beksi atawa nyang laen. Peninggalannya ntu masih terus dilakonin anak cucu H. Darip sampe sekarang. (H/H).

Sumber : http://portalbetawi.com/blog/nyak-sarfinah-baba-luh-kaga-mempan-ditembak-tong/